ប្រិយមិត្តប្រហែលជាធ្លាប់បានឃើញហើយនូវ នាមប័ណ្ណរបស់មេធាវី ឬ ក្រដាសក្បាលលិខិតរបស់មេធាវី ឬ ការិយាល័យមេធាវី កន្លងមក តើមេធាវីប្រើប្រាស់របស់ទាំងនេះ ដោយរបៀបណា ? ដោយមាត្រា ១៦ កថា. ទី ១ នៃក្រមសីលធម៌មេធាវីនៃគណៈមេធាវីនៃព្រះរាជាណាចក្រកម្ពុជា ឆ្នាំ២០១២ ពាក់ព័ន្ធនឹងក្រដាសសរសេររបស់មេធាវី និងនាមប័ណ្ណរបស់មេធាវី ត្រូវមានបែបបទដូចខាងក្រោម ៖

ក្រដាសសរសេររបស់មេធាវី ត្រូវចុះនិទ្ទេសដូចតទៅ ៖

– នាមត្រកូលបកតិនាមមេធាវី ឬ នាមករណ៍នៃក្រុមហ៊ុនមេធាវី

– រូបសញ្ញា Logo ប្រសិនជាមាន

– និទ្ទេស “មេធាវី” ឬ “មេធាវីនៃគណៈមេធាវីនៃព្រះរាជាណាចក្រកម្ពុជា”

– ទីលំនៅវិជ្ជាជីវៈដើម ហើយបើមានការិយាល័យសាខា ត្រូវចុះអាសយដ្ឋាននៃការិយាល័យសាខាដែលបានបើកដោយត្រឹមត្រូវតាមច្បាប់

– លេខកូដប្រៃសណីយ៍ ទូរគមនាគមន៍ និងបែបបទនៃទំនាក់ទំនងដទៃទៀត ប្រសិនជាមាន។

មេធាវីទាំងឡាយដែលបំពេញការងារនៅការិយាល័យប្រមូលផ្តុំ ដោយពុំបានធ្វើជាសមាគម ក្រោមរូបភាពណាមួយ អាចត្រូវអនុញ្ញាតឱ្យប្រើក្រដាសសរសេររួមបាន ក្រោមលក្ខខណ្ឌដែលមិនបង្កើតឱ្យមានការភ័ន្តច្រឡំជាមួយរចនាសម្ព័ន្ធការងារ។

នាមប័ណ្ណផ្ទាល់របស់មេធាវី ត្រូវចុះនិទ្ទេសដូចតទៅ ៖

– នាមត្រកូលបកតិនាមមេធាវី ឬ នាមករណ៍នៃក្រុមហ៊ុនមេធាវី

– រូបសញ្ញា Logo ប្រសិនជាមាន

– និទ្ទេស “មេធាវី”

– ទីលំនៅវិជ្ជាជីវៈដើម ហើយបើមានការិយាល័យសាខា ត្រូវចុះអាសយដ្ឋាននៃការិយាល័យសាខាដែលបានបើកដោយត្រឹមត្រូវតាមច្បាប់

– លេខកូដប្រៃសណីយ៍ ទូរគមនាគមន៍ និងបែបបទនៃទំនាក់ទំនាក់ទំនងដទៃទៀត ប្រសិនជាមាន។

ក្រៅពីបញ្ហាខាងលើ ប្រិយមិត្ត ប្រហែលជាធ្លាប់ឃើញ លិខិតបំភ្លឺ ឬ លិខិតធានាអះអាង របស់មេធាវីផ្សព្វផ្សាយតាមប្រព័ន្ធបណ្តាញសង្គម Facebook អន្តរាគមន៍ ទាក់ទិននឹងកូនក្តីរបស់ខ្លួនហើយ។ ទាក់ទងនឹងបញ្ហានេះ គ្រប់អន្តរាគមន៍សាធារណៈ ឬ តាមប្រព័ន្ធផ្សាយព័ត៌មានជាសាធារណៈរបស់មេធាវីក្នុងឋានៈខ្លួនជាមេធាវី អាចអនុញ្ញាតឱ្យធ្វើបានតែក្នុងក្របខ័ណ្ឌនៃការគោរពដោយម៉ឺងម៉ាត់នូវកាតព្វកិច្ចនៃវិជ្ជាជីវៈ។ អន្តរាគមន៍បែបនេះ ទាមទារឱ្យមានការប្រុងប្រយ័ត្ន ដោយអនុលោមតាមមាត្រា ១៧ នៃក្រមសីលធម៌មេធាវី៕

ទាញយកក្រមសីលធម៌មេធាវី ជា pdf ៖ https://bit.ly/3fEYpN2

ដោយ ៖ នីតិកោសល
Telegram : https://t.me/niteakosal
Instagram : https://www.instagram.com/niteakosal?r=nametag
Website : https://www.niteakosal.com/